DTH (Working Principle)

 നമ്മളെല്ലാം സ്ഥിരമായി ടെലിവിഷൻ ചാനലുകൾ കാണുന്നവരാണ്.
ഇതിൽ കുറെ ആളുകൾ DTH📡കൾ വഴിയായിരിക്കും ചാനലുകൾ കാണുന്നുണ്ടാവുക.
ഇങ്ങനെ DTH വഴി ചാനലുകൾ കാണുമ്പോൾ മഴ വരുന്ന സമയത്ത് ഒന്നും കിട്ടാത്ത അവസ്ഥയുണ്ടാകുന്നു😡.
എന്ത് കൊണ്ടാണ് ഇങ്ങനെ സംഭവിക്കുന്നത്?🤔

ഉപഗ്രഹങ്ങൾ വഴി സംപ്രേഷണം ചെയ്യപ്പെടുന്ന ചാനലുകൾ കാണാനായി നമ്മൾ പ്രധാനമായും 3 മാർഗ്ഗങ്ങളെയാണ് ആശ്രയിക്കാറുള്ളത്.

 1. നേരിട്ട് വലിയ ഡിഷ്‌ (സി ബാൻഡ്) ഉപയോഗിക്കും. പേ ചാനൽ അല്ലാത്ത ഫ്രീ ആയി ലഭിക്കുന്ന ചാനലുകൾ ഇങ്ങനെ കാണാം.
 
 2. കേബിൾ ടിവിക്കാർ നൽകുന്ന കേബിൾ കണക്ഷൻ വഴി കാണും.
 
 3. DTH കമ്പനികൾ നൽകുന്ന ചെറിയ വലുപ്പത്തിലുള്ള ഡിഷുകൾ (Ku Band ) ഉപയോഗിച്ചുള്ള കണക്ഷൻ വഴി കാണാം.
(ഇതല്ലാതെ അതാത് ചാനലുകൾ ഇന്റർനെറ്റ് വഴി കൊടുക്കുന്ന ലിങ്കുകൾ വഴിയും കാണാൻ സാധിക്കും. ഇന്റർനെറ്റ് സഹായമില്ലാതെ ഉപഗ്രഹ ചാനലുകൾ കാണാൻ മേൽ സൂചിപ്പിച്ച 3 മാർഗങ്ങളാണ് ഉപയോഗപ്പെടുത്തുന്നത്.)

    ഇതിൽ ഒന്നാമത് സൂചിപ്പിച്ച മാർഗം, മിക്ക ചാനലുകളും പേ ചാനലുകൾ ആയതോടെ ഏതാണ്ട് കാലഹരണപ്പെട്ടു. ഡിഷ്‌ ട്രാക്കിംഗ് ഹോബിയുള്ള കുറച്ചാളുകൾ മാത്രമാണ് ആദ്യം പറഞ്ഞ രീതിയിൽ ഉപഗ്രഹ ചാനലുകൾ കാണുന്നത്.
    
     ഇന്ന് ഏറ്റവും കൂടുതൽ ആളുകൾ കേബിൾ കണക്ഷൻ വഴിയും DTH കൾ വഴിയുമാണ് ഉപഗ്രഹ ചാനലുകൾ കാണുന്നത്.
      നമ്മളിൽ മിക്ക ആളുകളും  ടിവി ചാനലുകൾ സാറ്റലൈറ്റ് വഴി ലഭിക്കാൻ വിവിധ DTH കളെ ആശ്രയിക്കുന്നവരാണ്. ഡിഷ് ടിവി, സൺ ടിവി, വീഡിയോകോൺ, ടാറ്റാ സ്കൈ, എയർടെൽ...തുടങ്ങിയ ഏതെങ്കിലും പ്രൈവറ്റ് ഡിടിഎച്ച് കമ്പനികളെ ആശ്രയിച്ചാണ് ടിവി ചാനലുകൾ കാണാറുള്ളത്.

ഒരു DTH എന്ന് പറഞ്ഞാൽ മൂന്ന് കാര്യങ്ങളാണ് നമ്മുടെ ശ്രദ്ധയിൽ പെടാറുള്ളത്.

1.ഒരു ചെറിയ ഡിഷ്‌ ആന്റിന.
2. ആ ആന്റിനയിൽ പുറത്തേക്ക് തള്ളി നിൽക്കുന്ന ഒരു കമ്പിയിയും അതിൽ ഫിറ്റ് ചെയ്തിരിക്കുന്ന LNB എന്ന ഉപകരണം.
3. LNB യിൽ നിന്നും വരുന്ന വയർ കണക്ട് ചെയ്യപ്പെട്ടിരിക്കുന്ന ഒരു സാറ്റലൈറ്റ് റിസീവർ.

ഇവ ഓരോന്നും നോക്കാം.
ഇവിടെ ഒന്നാമത് സൂചിപ്പിച്ച ഡിഷ്‌ ആന്റിന എന്നത് ഉപഗ്രഹത്തിൽ നിന്നും വരുന്ന സിഗ്നൽ സ്വീകരിച്ച് അതിനെ ഒരു ഫോക്കൽ പോയിന്റിലേക്ക് കേന്ദ്രീകരിക്കാനുള്ള സംവിധാനമാണ്.
എന്തിനാണ് ഇങ്ങനെ ചെയ്യുന്നത്?

നോക്കാം.
ഒരു വാർത്താ വിനിമയ ഉപഗ്രഹം ഭൂമിയിൽ നിന്നും ഏകദേശം 36000 കിലോമീറ്റർ ഉയരത്തിലാണ് ഉള്ളത്.
ഒരു പ്രത്യേക സ്ഥലത്ത് ഉപഗ്രഹം സ്ഥാപിക്കപ്പെട്ടതിനുശേഷം ഭൂമി കറങ്ങുന്ന അതേ വേഗതയിൽ ഉപഗ്രഹം ഭൂമിയെ ചുറ്റുന്നു.
ഉദാഹരണമായി ഇന്ത്യയുടെ മുകളിൽ ഒരു ഉപഗ്രഹം വിക്ഷേപിച്ചു എന്ന് കരുതുക. അവിടെനിന്ന് ഭൂമി കറങ്ങുന്ന അതേ സ്പീഡിൽ അത് ഭൂമിയോടൊപ്പം കറങ്ങാൻ ആരംഭിക്കുന്നു.
അത് കൊണ്ട് ഇത്തരമൊരു ഉപഗ്രഹത്തെ ഭൂമിയുടെ, ഒരു പ്രത്യേക ഭാഗത്തു നിന്നു നോക്കുന്ന സമയത്ത് അത്‌ സ്ഥിരമായി നിൽക്കുകയാണെന്ന് തോന്നും. (ആ പോയിൻറ് ലേക്ക് കൃത്യമായി ഒരു ഡിഷ്‌ ആന്റിന ഫോക്കസ് ചെയ്താൽ ആ ഉപഗ്രഹത്തിൽ നിന്നുള്ള സിഗ്നൽ എടുക്കുവാൻ സാധിക്കും.)
ഇങ്ങനെയുള്ള ഉപഗ്രഹങ്ങൾ  ഉപയോഗിച്ചാൽ ഭൂമി മുഴുവനും ആശയവിനിമയം നടത്താൻ സാധിക്കും. എന്നാൽ ഒരു പ്രശ്നമുണ്ട്.
ഇവയിൽ നിന്നുള്ള സിഗ്നൽ 36000(മുപ്പത്താറായിരം )കിലോമീറ്റർ സഞ്ചരിച്ചു ഭൂമിയിലെത്തുമ്പോഴേക്കും ശക്തികുറഞ്ഞു പോകുന്നു.
ഇങ്ങനെ ശക്തി കുറഞ്ഞു പോയ സിഗ്നലിനെ പിടിച്ചെടുത്തു ഒരു ഫോക്കൽ പോയിന്റിലേക്ക് കേന്ദ്രീകരിച്ചു, ശക്തി കൂട്ടാനാണ് ഡിഷ്‌ ആന്റിനകൾ ഉപയോഗിക്കുന്നത്.
നമ്മൾ പണ്ട് ലെൻസ്‌ ഉപയോഗിച്ച് സൂര്യ പ്രകാശം ഒരു കടലാസിലേക്ക് കേന്ദ്രീകരിച്ച് തീ ഉണ്ടാക്കിയിട്ടില്ലേ.
അത് പോലെ ഡിഷിലേക്ക് എത്തുന്ന സിഗ്‌നലുകൾ ഡിഷിന്റെ പ്രത്യേക ആകൃതി കാരണം റിഫ്ളക്ട് ചെയ്യപ്പെട്ട് ഒരു പ്രത്യേക സ്ഥലത്ത് കേന്ദ്രീകരിക്കുന്നു. ആ സ്ഥലത്താണ് നമ്മൾ LNb വെക്കുന്നത്.

ഇനി ഉപഗ്രഹത്തിൽ നിന്നും വരുന്ന സിഗ്നലിന്റെ കാര്യം നോക്കാം.

(കൂടുതൽ വിശദമായി infozonemalayalam എന്ന ചാനലിലൂടെ വിശദീകരിച്ചിട്ടുണ്ട് )
 ഇലക്ട്രോമാഗ്നെറ്റിക് സ്പെക്ട്രത്തിലെ മൈക്രോവേവ് വിഭാഗത്തിൽ പെടുന്ന തരംഗങ്ങളെയാണ് സാറ്റെലൈറ്റ് കമ്മ്യൂണിക്കേഷന് വേണ്ടി ഉപയോഗപ്പെടുത്തുന്നത്.
വൈദ്യുത കാന്തിക സ്പെക്ട്രത്തിലെ 10 GHz ൽ താഴെയുള്ള ഫ്രീക്വൻസികളാണ് C-band ൽ ഉപയോഗിക്കുന്നത്.
 നമ്മൾ പണ്ട് കാലങ്ങളിൽ എല്ലായിടത്തും കാണാറുള്ള വലിയ ഡിഷ്‌ ആന്റിനകൾ പ്രവർത്തിച്ചത് C ബാൻഡ് ഉപയോഗിച്ചായിരുന്നു.
സ്പെക്ട്രത്തിലെ ഫ്രീക്വൻസി കുറഞ്ഞ  തരംഗങ്ങളാണ് C ബാൻഡിൽ ഉപയോഗിക്കുന്നത്.
ഫ്രീക്വൻസി കുറഞ്ഞ തരംഗങ്ങൾക്ക് ഊർജ്ജം കുറവായിരിക്കും.
ഫ്രീക്വൻസി കുറയുമ്പോൾ തരംഗ ദൈർഘ്യം കൂടുതലായിരിക്കും.
അതായത് ഫ്രീക്വൻസി കുറഞ്ഞ തരംഗത്തിന്റെ വലുപ്പം കൂടുതലായിരിക്കും.
ഈ വിഭാഗത്തിലെ തരംഗങ്ങൾ മഴത്തുള്ളിയേക്കാൾ വലുതായിരിക്കും.
ഈ അളവിനുള്ളിൽ വരുന്ന ഫ്രീക്വൻസിയെ കനത്ത മഴ ബാധിക്കില്ല.
പക്ഷെ സിഗ്നലിന്റെ ശക്തി വളരെ കുറവായിരിക്കും. അത് കൊണ്ട് 180 സെന്റി മീറ്റർ മുതൽ വ്യാസമുള്ള വലിയ ഡിഷ്‌ ആന്റിന ഇത്തരം സിഗ്നലുകൾ സ്വീകരിക്കാനായി ആവശ്യമാണ്.

      ഇലക്ട്രോമാഗ്നെറ്റിക് സ്പെക്ട്രതിലെ 10 മുതൽ 18 വരെ GHz വരെയുള്ള മൈക്രോവേവ് ഫ്രീക്വൻസി ആണ് Ku band എന്നറിയപ്പെടുന്നത്.
ഫ്രീക്വൻസി കൂടുതലായതിനാൽ ഈ ബാൻഡിലെ സിഗ്നലുകൾ വളരെയധികം ശക്തിയുള്ളതായിരിക്കും.
അത് കൊണ്ട് KU ബാൻഡ് സിഗ്നൽ പിടിച്ചെടുക്കാൻ 30 സെന്റിമീറ്റർ വ്യാസമുള്ള ഡിഷ്‌ ആന്റിനകൾ ഉപയോഗിച്ച് പോലും സാധിക്കും.
കെയു ബാൻഡിൽ പ്രവർത്തിക്കുന്ന ഉപഗ്രഹങ്ങളാണ് ഡി.റ്റി.എച്ച്. സേവനത്തിനായി, DTH കമ്പനികൾ പ്രയോജനപ്പെടുത്തുന്നത്.
ഫ്രീക്വൻസി കൂടിയതിനാൽ തരംഗദൈർഘ്യം കുറവുള്ള കെ യു ബാൻഡ് തരംഗങ്ങൾ സി ബാൻഡ് താരംഗങ്ങളെക്കാൾ വളരെ ചെറിയ തരംഗങ്ങളായിരിക്കും.
ഒരു മഴത്തുള്ളിക്കോ മഞ്ഞു തുള്ളിക്കോ, വളരെ എളുപ്പത്തിൽ തടസ്സമുണ്ടാക്കാൻ ആകുന്ന വിധത്തിൽ ഇവ  ചെറുതായിരിക്കും.
അതുകൊണ്ടുതന്നെ മഴയോ മഞ്ഞോ ഉണ്ടാകുന്ന സമയത്ത്, ഈ തടസ്സങ്ങളെ തരണം ചെയ്ത് ഭൂമിയിലേക്ക് എത്താൻ k u ബാൻഡ് സിഗ്നലുകൾ പ്രയാസപ്പെടുന്നു. ഇത് കാരണം നമ്മുടെ ചെറിയ ഡിഷ് ആന്റിനയിൽ പതിക്കുന്ന സിഗ്നലിന്റെ അളവ് കുറയുന്നു. അപ്പോഴാണ് നമ്മൾ കാണുന്ന ചാനൽ കട്ട് ആക്കാൻ തുടങ്ങുന്നുണ്ട്. വളരെ വലിയ മഴയാണെങ്കിൽ ഡിഷ് ആന്റിനയിലേക്ക് തീരെ സിഗ്നൽ എത്താത്ത അവസ്ഥ ഉണ്ടാകും. അപ്പോൾ ചാനൽ പൂർണമായും കട്ട് ആകുന്നു. ഈ പ്രശ്നം പരിഹരിക്കാൻ ഉപഗ്രഹത്തിൽ തന്നെ സംവിധാനങ്ങൾ ഉണ്ടെങ്കിലും അതൊന്നും പൂർണമായും വിജയിച്ചിട്ടില്ല. അതുകൊണ്ടുതന്നെ  ലോകത്ത് ഏറ്റവും കൂടുതൽ തവണ മഴയുണ്ടാകുന്നത് പ്രദേശങ്ങളിൽ KU ബാൻഡിലൂടെയുള്ള ഉപഗ്രഹ വാർത്താവിനിമയം വിജയകരം അല്ല.( infozonemalayalam എന്ന ചാനലിലൂടെ ഈ വിഷയം കൂടുതൽ വിശദമാക്കിയിട്ടുണ്ട്.)
        മഴയുള്ള സമയത്ത് ചാനൽ കിട്ടാതായാൽ dth കമ്പനികളെ കുറ്റം പറഞ്ഞിട്ട് കാര്യമില്ല.ഈ ടെക്‌നോളജിയുടെ ഒരു പോരായ്മയാണിത്.
       ഡിഷ്‌ ആന്റിന മാക്സിമം സിഗ്നൽ ലഭിക്കുന്ന രീതിയിൽ ഫിറ്റ് ചെയ്‌താൽ, ആന്റിനയുടെ വലുപ്പം കൂട്ടിയാൽ ഒക്കെ ഈ പ്രശ്നം കുറച്ചൊക്കെ പരിഹരിക്കാൻ സാധിക്കും.